Soutribbetjie

2012-11-07-LambIn die tye voor ys- en vrieskaste het die mense planne gemaak om vleis te bewaar. As daar die dag geslag is, is die onderskeie snitte gepekel, gerook of gedroog om langer te hou. Hoewel die rib oor die kole gaar gemaak word, word dit eers soos biltong behandel – vandaar die sout. Indien jy dit nie so sout verkies nie, kan jy die vleis in koue water uitvars voordat dit winddroog gemaak word. Die hele proses gaan jou n tydjie neem en jy moet jou spesiale rib braai so beplan dat die rib eers vir 2 dae in ‘n sout en koljandermengsel kan le, waarna dit opgehang word totdat dit winddroog is. Dan moet dit vir n uur of wat pot toe, voordat hy gebraai word. Maar glo my, jou mense gaan hul vingers aflek.

6 porsies

20 ml bruinsuiker

200ml growwe sout

2 ml salpeter (opsioneel verskaf slegs n mooi pienk kleur)

50 ml geskroeide koljandersaad

20 ml bruin asyn

1 skaaprib van sowat 1,5kg

Bietjie wonderpeper vir ekstra geur.

  1. Meng die suiker,sout,salpeter,koljander en asyn en vryf dit in die vleis. Plaas die vleis in n bak bedek dit en sit dit vir 2-3 dae in die yskas. Draai dit soggens en saans om.
  2. Hang nou die vleis in n koel, lugtige plek waar dit winddroog kan word.
  3. Spoel die ribbetjie af en sit dit in n groot kastrol. Bedek die rib heeltemal met water en bring dit tot kookpunt. Verlaag die hitte en laat prut vir sowat 1 uur. Haal die rib uit die vloeistof en laat dit afkoel.
  4. Druk die vleis droog met kombuispapier en rooster die ribbetjie oor matige, stadige kole tot goudbruin en gaar. Sny in porsies en sit voor.